ШАБИ ЗЕБО БА ДОМАНИ ШАҲР АСТ
Дар фазо як ситора метобад,
Акси он дар миёнаи наҳр аст.
Ёр дар хонааш чӣ мехобад?..
Шаби зебо ба домани шахр аст.
Домани шаҳру наҳри зебое,
Тарки хобат намой, дилбари ман.
Аз дари манзилат бурун ой,
Раҳ бипурс аз ситораи равшан.
Ҳардуи мо шинос мебошем,
Ошнои шабони бехобӣ.
Хабарамро бипурс аз он доим,
Роҳро гар ба сӯи ман кобӣ...
Ёр дар хонааш чӣ мехобад?
Сайри бе вай барои ман заҳр аст...
Дар фазо як ситора метобад,
Акси он дар миёнаи наҳр аст!
***
Лабони ёри мо ғарқи табассум,
Нигоҳаш, гӯӣ оташпора бошад.
Даруни ин дили овора бошад –
Шуда сӯрох аз барқи табассум!
Табассум ин қадар зебо шавад-мӣ?
Ба ҷонам, то кунун мислаш надидам.
Ба ёдаш меҳри поке парваридам,
Дами васле насиби мо шавад-мӣ?
Замину осмон ғарқи табассум,
Табассум мекунад моҳу ситора.
Вале чун ёр бинмояд назора –
Аён гардад ба мо фарқи табассум!