ДАР КАФИ МО ДОМАНИ САЙЁРАҲОСТ
Субҳи нав файзи наве меоварад,
Бар дили мо партаве меоварад.
Аз барои толибони илму фан –
Хоҳиши болоравӣ меоварад.
Сӯи донишгоҳ
Мо қадам занем.
Ҷониби пагоҳ
Мо қадам занем.
Мо ҳама доништалаб мардони нек,
Соҳибони инчунин даврони нек.
Орзу дорем то гӯяд Ватан:
Шодмонам ман зи фарзандони нек.
Сӯи донишгоҳ
Мо қадам занем.
Ҷониби пагоҳ
Мо қадам занем.
Аз падарҳо шоду миннатдор мо,
Чун аз онҳо – содиқи ҳар кор мо.
Дар кафи мо домани сайёраҳост,
Бар ҳама амри Ватан тайёр мо.
Сӯи донишгоҳ
Мо қадам занем.
Ҷониби пагоҳ
Мо қадам занем.