ҲАВАСИ САЙРИ БОҒ МЕКАРДАМ
Ҳаваси сайри боғ мекардам,
Бӯи гул бар димоғи ман омад.
Шамъи рӯе суроғ мекардам,
Ки зи дар он чароғи ман омад.
Хостам тирамоҳро бинам,
Ки зимистон надошт тоқату сабр,
Хостам нури моҳро бинам,
Пора шуд дар баҳор синаи абр.
Тирамоҳ аст ё зимистон аст,
Ё ки фасли накӯи тобистон,
Раҳашон аз дили баҳорон аст,
Нашъаи навбаҳор садчандон!..
Гар дар оғӯши ин диёри мананд,
Ҳамаи фаслҳо баҳори мананд!
Ноябри 1961, ш. Москва